කොවිඩ් වෛරසය මුළුමනින්ම මැඩපැවැත්විය නොහැකි බව චීන විද්‍යාඥයන් පිරිසක්ද පසුගියදා අනාවරණ කර තිබුණි.
එවන් පසුබිමක වෛරසය පැතිරීම පාලනය කොට දෛනික කටයුතු ආරම්භ කිරීම කෙරෙහි රටවල් රැසක් මේ වන විට අවධානය යොමු කර තිබේ.
කොවිඩ් වෛරසය මුළුමනින්ම මර්දනය නොකළ වාතාවරණයක් තුළ සාමාන්‍ය ජන ජීවිතය පවත්වාගන්නේ කෙසේද?
මේ දැනුම්වත් කිරීම ඒ පිළිබඳවයි.
දැනට ක්‍රියාත්මක ඇඳිරි නීති රෙගුලාසි ලිහිල් කර එළඹෙන මැයි 11 වැනිදා සාමාන්‍ය කාර්යාලයීය කටයුතු යළි ආරම්භ කිරීම සඳහා රජය සැලසුම් කර තිබේ.
ඒ අනුව ඇඳිරි නීතිය ඉවත් කර දෛනික කටයුතු ආරම්භ වීමත් සමග වෛරස ව්‍යාප්තිය වැළැක්වීම මෙන්ම ඔබ අසාදිතයෙකු බවට පත්වීම වළක්වාගැනීම සඳහා අනුගමනය කළ යුතු සෞඛ්‍යාරක්ෂිත ක්‍රමවේද රැසක් පවතියි.
ඔබ කාර්යාලයට යාමට ප්‍රථම උදෑසන අවදි වී පිරිසිදු වීමෙන් අනතුරුව කාර්යාලය සඳහා සුදුසු පහසු ඇඳුමක් ඇඳගත ගත යුතුයි.
නිවසින් බැහැර වීමට පෙර මුඛ ආවරණය පැළඳීම ඔබ අනිවාර්යෙන්ම කළ යුත්තකි.
විවිධ විලාසිතාවලින් යුතු ආභරණ හා ආයිත්තම් පැළඳිම ඔබ නොකළ යුතු අතර අවශ්‍යම දෑ පමණක් කාර්යාලයට රැගෙන යාමට වගබලාගත යුතුය.
ඔබ කාර්යාලයට පැමිණීම සඳහා පොදු ප්‍රවාහන සේවය භාවිත කරන්නේ නම්, බස් රථයේ හෝ දුම්රියේදී මගීන් අතර දුරස්ථභාවය පවත්වාගෙන යාම අමතක නොකළ යුතුය.
ඔබ, ඔබේ පෞද්ගලික වාහනයෙන් සේවා ස්ථානයට පැමිණෙන්නේ නම් කාර්යාලීය හැඳුනුම්පත හා ජාතික හැඳුනුම්පත පෙන්වා පොලීසිය හා ආරක්ෂක අංශවලට සහය දැක්වීමට වග බලා ගත යුතුය.
කාර්යාල පරිශ්‍රයට ඇතුළු වන ඔබ, හොඳින් අත සෝදා විෂබීජහරණය සිදුකර ශරීර උෂ්ණත්වය මැන බැලිය යුතුය.
විදුලි සෝපානය භාවිත කිරීමේදිත් නිසි ක්‍රියාමාර්ග අනුගමනය කර දුරස්ථභාවය රැකගනිමින් එහි ගමන් කිරීම ඉතාම වැදගත්ය.
කාර්යාලයට ඇතුළුමේදී විෂබීජනාශක දියර යොදා නැවත දෑත් පිරිසිදු කර ගත යුතුය.
වැලමිට යොදා ගනිමින් මෙලෙස කාර්යාල දොර විවෘත කිරීමට හැකියාව පවතියි.
රාජකාරි කටයුතු ආරම්භ කිරීමට පෙර විෂබීජනාශක දියර යොදා කාර්යාලීය උපකරණ හා ඔබ දෛනිකව භාවිත කරන දෑ පිරිසිදු කර ගත යුතු අතර අත් වැසුම් භාවිත කිරීමටත් වග බලා ගත යුතුය.
කාර්යාලය තුළ මුදල් ගනුදෙනු සිදුකිරීම හා ලිපි ගොනු භාවිත කරන්නේ නම් එම කාර්යයෙන් පසු විෂබීජනාශක දියර යොදා අත් සේදීමත්, කාර්යාලයේ රැඳී සිටින කාලය තුළ නිතර නිතර අත් සේදීමත් ඔබව වෛරසයෙන් ආරක්ෂා වීමට හේතු වේ.
එමෙන්ම, කාර්යාලයේදී තමන්ගේ භාවිතයට පමණක් කෝප්පයක් හා පිඟානක් භාවිත කිරීමට වගබලා ගැනීමද අනිවාර්ය කරුණකි.
ආහාර ගැනීමේදීත් දුරස්ථභාවය රැක ගතයුතු වන අතර තනිවම ආහාර ගැනීම වෛරසය ආසාදනය වීමෙන් වැළකී සිටීමට රුකුලක් වනු ඇත.
කාර්යාල රැස්වීම් පැවැත්වීමේදීත් දුරස්ථභාවය රැකගනිමින් එය සිදු කිරීමට අමතක නොකළ යුතුය.
කාර්යාලයෙන් පසු නැවත නිවසට පැමිණීමට පෙර ඔබ අත සේදීමත් නැවත විෂබීජහරණ කුටියට ඇතුළු ඇඳුම් සහ ශරීරය විෂබීජහරණයට ලක්කර ගැනීම වඩාත් සුදුසු වෙි.
එමෙන්ම, නිවසට ඇතුළුමට පෙර පාවහන් පිටතින් ගළවා ඇඟ පිරිසිදු කරගැනීමෙන් පසු නිවස තුළට ඇතුළුවීමෙන් කොවිඩ් 19 වෛරසයෙන් ඔබත් ඔබේ පවුලේ සාමාජිකයන්ද ආරක්ෂා කර ගත හැකිය.
ඔබ, මිතුරන් කිහිපදෙනෙකු සමග තාවකාලික නවාතැනක වෙසෙනවා නම් එම කාමරය තුළත් මෙලෙස දුරස්ථභාවය රැකගනිමින් කටයුතු කිරීමට වගබලාගත යුතුය.
