පරිසර පද්ධති සංරක්ෂණ හා කළමනාකරණ ව්‍යාපෘතිය (ESCAMP) විසින් බත්තරමුල්ල පිහිටි “ඉදිකිරීම් උපකරණ පුහුණු මධ්‍යස්ථානයේ“ (CETRAC) දී අන්තර් ක්‍රියාකාරී වැඩමුළුවක් පසුගිය දා (දෙසැම්බර් 3) පවත්වන ලදී.
මෙම වැඩමුළුවේ මූලික පරමාර්ථය වූයේ හුරුළු-කවුඩුල්ල සහ කන්තලේ (HKK) භූ දර්ශනය සඳහා සංවර්ධනය කරන ලද මූලික ඉඩම් කළමනාකරණ සැලැස්ම (LMP) ඉදිරිපත් කිරීම සහ සමාලෝචනය කිරීමයි. තෝරාගනු ලැබූ හුරුළු-කවුඩුල්ල-කන්තලේ (HKK) භූ දර්ශන ප්‍රදේශය තුළ හෙක්ටයාර 520,000 ක් ආවරණය වී තිබේ. භූ දර්ශනයෙන් 51% ක් පමණ වන ප්‍රදේශයක් වන සංරක්ෂණ දෙපාර්තමේන්තුව හෝ වනජීවී සංරක්ෂණ දෙපාර්තමේන්තුව විසින් පාලනය වේ. මෙම ක්‍රියාව රටට විවිධාකාරයෙන් වැදගත් ය. .
මෙම භූ දර්ශන කළමනාකරණ සැලසුමට තෝරාගෙන ඇති ප්‍රදේශය දිස්ත්‍රික්ක තුනක් (ත්‍රිකුණාමලය, අනුරාධපුර සහ පොළොන්නරුව) සහ ග්‍රාම නිලධාරී කොට්ඨාස 14ක් හා ගංගා ද්‍රෝණි 10 ක් ආවරණය කරයි. මෙවැනි පුළුල් ඉඩම් කළමනාකරණ සැලසුමක් රටක් තුළ සංවර්ධනය කිරීමේ පළමු උත්සාහය මෙය වන අතර එහි පුරෝගාමිත්වය ඉඩම් පරිමාණ කළමනාකරණ සැලසුම්කරුවන්ට කදිම ආදර්ශයක් හා මගපෙන්වීමක් වනු නිසැකය. පරිසර පද්ධති, ස්වාභාවික සම්පත් වැඩිදියුණු කිරීම සහ එමඟින් අවදානමට ලක්විය හැකි ප්‍රජාවන්ගේ සමාජ ආර්ථික තත්වයන් වැඩිදියුණු කිරීම සඳහා ප්‍රධාන මැදිහත්වීම් ගණනාවක් දැනටමත් හඳුනාගෙන තිබේ.
මෙම සැලැස්ම ප්‍රධාන වශයෙන් අවධානය යොමු කර ඇත්තේ පාර්ශවකරුවන් විසින් මෙහෙයවනු ලබන සංවර්ධන වැඩසටහන් සැලසුම් කිරීම සහ ක්‍රියාත්මක කිරීමයි. එය පාර්ශවකරුවන්ගේ ප්‍රධාන වගකීමයි. එබැවින් මෙම වැඩමුළුව ඔවුන් සඳහා වැදගත් වූ අතර සැලැස්මේ ගුණාත්මකභාවය ඉහළ නැංවීමට දායක විය. සහභාගිවූ සම්පත්දායකයින් මෙන්ම පාර්ශවකරුවන්ගේ අදහස්, යෝජනා හා අත්දැකීම් හුවමාරු කර ගැනීමෙන් මෙම ක්‍රියාවලිය වඩාත් සම්පූර්ණ වනු ඇත. ඒ නිසාම අවසාන වාර්තාව සකස් කිරීමට පෙරාතුව මෙවැනි තවත් වැඩමුළුවන් සංවිධානය කෙරෙන අතර එහිදීද ඉදිරිපත් කෙරෙන යෝජනා, හා අදහස් උදහස් සැලකිල්ලට ගනිමින් වඩාත් ඵලදායි ලෙස අවසන් භූ දර්ශන සැලැස්ම සම්පාදනය කිරීම සිදුවනු ඇත.
