පරිසර පද්ධති සංරක්ෂණ හා කළමනාකරණ ව්‍යාපෘතිය (ESCAMP) විසින් ඉකුත් දෙසැම්බර් මස 20 දින බත්තරමුල්ල පිහිටි ගෑන්ඩ් මොනාච් හෝටල් ශ්‍රවණාගාරයේදී , හුරුළු-කවුඩුල්ල සහ කන්තලේ (HKK) භූ දර්ශනය සඳහා සංවර්ධනය කරන ලද මූලික ඉඩම් කළමනාකරණ සැලැස්ම (LMP) සමාලෝචනය කිරීමට අදාළ වැඩමුළුවක් පවත්වන ලදී.
මෙම වැඩමුළුවට පරිසර සංවිධාන ඇතුළු පාර්ශවකරුවන් බොහෝ දෙනෙකු සහභාගි වූ අතර මෙම වැඩමුළුවේ මූලික පරමාර්ථය වූයේ හුරුළු-කවුඩුල්ල සහ කන්තලේ (HKK) භූ දර්ශනය සඳහා සංවර්ධනය කරන ලද මූලික ඉඩම් කළමනාකරණ සැලැස්ම (LMP) ඉදිරිපත් කිරීම සහ සමාලෝචනය කිරීමයි. තෝරාගනු ලැබූ හුරුළු-කවුඩුල්ල-කන්තලේ (HKK) භූ දර්ශන ප්‍රදේශය තුළ හෙක්ටයාර 520,000 ක් ආවරණය වී තිබේ. භූ දර්ශනයෙන් 51% ක් පමණ වන ප්‍රදේශයක් වන සංරක්ෂණ දෙපාර්තමේන්තුව හෝ වනජීවී සංරක්ෂණ දෙපාර්තමේන්තුව විසින් පාලනය කෙරෙයි.
මෙදින පැවති වැඩමුළුවේදී මෙම සැලසුම ප්‍රායෝගිකව ක්‍රියාත්මක කිරීමේ පවත්නා අභියෝග හා ජාතික ප්‍රතිපත්ති මෙන්ම රාජ්‍ය ආයතනවල මැදිහත්වීම සිදුවන්නේ කෙසේද යන්න පිළිබඳ ඇතැමුන් ප්‍රශ්න කරන ලද අතර සැලසුම් සම්පාදකයින් මෙන්ම ව්‍යාපෘති කළමනාකරණ ඒකකයේ නියෝජිතයින් රාජ්‍ය ආයතන සමග ඒකාබද්ධවෙමින් රටේ ජාතික ප්‍රතිපත්තීන්ට අනුකූලව වැඩපිළිවෙළ ඉදිරියට ගෙන යා හැකි අයුරු පිළිබඳ දීර්ඝ වශයෙන් සාකච්ඡා කරන ලදී. රක්ෂිත වනාන්තර ඇතුළු පරිසරය ආරක්ෂා කරගනිමින් සංවර්ධන සැලසුම් දියත් කිරීමේ වැදගත්කම අදාළ සංවිධාන විසින් පෙන්වාදුන් අතර මෙම සැලසුම වඩා ඵලදායි කරනු පිණිස තම අදහස් හා යෝජනා ඉදිරි දෙසතියක කාලය තුළ ලිඛිතව ලබාදෙන බවට ඔවුහු පොරොන්දු වූහ.
කෙසේ වෙතත් මෙම සැලැස්ම ප්‍රධාන වශයෙන් අවධානය යොමු කර ඇත්තේ පාර්ශවකරුවන් විසින් මෙහෙයවනු ලබන සංවර්ධන වැඩසටහන් සැලසුම් කිරීම සහ ක්‍රියාත්මක කිරීම පිළිබඳවයි. එය පාර්ශවකරුවන්ගේ ප්‍රධාන වගකීමයි. එබැවින් මෙම වැඩමුළුව ඔවුන් සඳහා වැදගත් වූ අතර සැලැස්මේ ගුණාත්මකභාවය ඉහළ නැංවීමට දායක විය. අවසාන වාර්තාව සකස් කිරීමට පෙරාතුව මෙවැනි තවත් වැඩමුළුවන් සංවිධානය කෙරෙන අතර එහිදීද ඉදිරිපත් කෙරෙන යෝජනා, හා අදහස් උදහස් සැලකිල්ලට ගනිමින් වඩාත් ඵලදායි ලෙස අවසන් භූ දර්ශන සැලැස්ම සම්පාදනය කිරීම සිදුවනු ඇත.
